जेठ ३, २०८३ / 2026-05-17
जनकपुरधाम– मधेस प्रदेश सरकारमा मुख्यमन्त्री सरोजकुमार यादवको नियुक्तिविरुद्ध सर्वोच्च अदालतमा रिट परेको छ।
शुक्रबार प्रदेश प्रमुख सुमित्रा सुवेदी भण्डारीले महोत्तरीको बर्दिवासस्थित पानस होटलमा यादवलाई मुख्यमन्त्रीका रुपमा नियुक्ति र शपथ खुवाएपछि सात दल रिट लिएर सर्वोच्च अदालतमा गएका हुन् ।
यादवले नेपालको संविधान तथा प्रचलित कानुनबमोजिम नै मुख्यमन्त्रीमा नियुक्त भएको बताए पनि प्रदेश प्रमुख भण्डारीलाई सरकारले सोमबार नै बर्खास्त गरिसकेको छ।
प्रदेशको सबैभन्दा ठूलो राजनीतिक दल भएको र सबैभन्दा बढी प्रदेशमा सांसद भएकाले यादवलाई संविधानको धारा १६८ को उपधारा (३) बमोजिम मुख्यमन्त्री बनाइएको प्रदेश प्रमुख भण्डारीले बताएकी थिइन् ।
तर भण्डारीको पद सोमबार नै गइसकेको छ । यादव मुख्यमन्त्री भएपछि विपक्षी राजनीतिक दल तथा तिनका कार्यकर्ताहरूले मधेस प्रदेश भवनभित्र तोडफोड तथा टायर बालेर विरोध प्रदर्शन गरेका थिए ।
यही प्रकरणमा सात दलका तर्फबाट मुख्यमन्त्रीको पद खारेजीको माग गर्दै ७४ जना प्रदेशसभा सदस्यहरूले संयुक्त रूपमा सर्वोच्च अदालतमा मुद्दा दायर गरेका छन्। उक्त मुद्दा दर्ता भइसकेको छ । अब बुधबार यो मुद्दामा सुनुवाइ हुने गरी पेशी तोकिएको छ।
