आश्विन २१, २०८३ / 2026-10-07
काठमाडौँ । नेपाली कांग्रेसका सांसद प्रदीप पौडेलले सुन तस्करी प्रकरणमा उच्चस्तरीय समिति बनाएर छानबिन प्रक्रिया अघि बढाउनुपर्ने बताएका छन् । कांग्रेस संसदीय दलको बैठकमा उनले उच्चस्तरीय छानबिन समिति बनाउनुपर्ने निर्णय बैठकले गर्नुपर्ने बताए । सांसद पौडेलले सरकारका उच्च अधिकारीहरूको संलग्नताबिना एयरपोर्टबाट सय केजी सुन तस्करी गर्ने कल्पनासम्म पनि गर्न नसक्ने बताए ।
‘एयरपोर्टबाट सय किलो सुन ल्याउँदा अध्यागमन र सुरक्षा निकायको मिलेमतो नभएको कुरा कसैले पत्याउँदैन । यो उच्चस्तरकै संलग्नता नभएको हो भनेर यसै भन्न सकिँदैन,’ उनले भने । सुन प्रकरणको तीन हप्ता बितिसक्दा पनि छानबिन नभएको उनको भनाइ छ । ‘यही विषयले संसद् अवरुद्ध छ । त्यसकारण हामीले आजै उच्चस्तरीय छानबिन समिति बनाएर अनुसन्धानका लागि बाटो खुला गर्नुपर्छ, यसको कुनै विकल्पै छैन ।’
सुन प्रकरणसँगै अहिलेसम्मका सबै चर्चित भ्रष्टाचारका काण्डहरूको छानबिन हुनुपर्ने उनले बताए । कांग्रेसले संसद्लाई सञ्चालन गर्न नेतृत्व गर्नुपर्ने पौडेलको भनाइ छ । उनले संविधान कार्यान्वयनमा ल्याउन १५० वटा कानुन बनाउन आवश्यक रहेको भन्दै अहिले संसद्को प्रमुख दलको हिसाबले संसद खुलाउन कांग्रेसले अगुवाइ गर्नुपर्ने बताए ।
