भाद्र १०, २०८३ / 2026-08-26
काठमाडौं, १० पुष । प्रधानमन्त्रीको नाम पेश गर्न शीतल निवासले दिएको समय सीमा घर्किँदै गर्दा सत्तागठबन्धनका प्रमुख दलहरू कांग्रेस र माओवादीको शीर्ष नेतृत्व आन्तरिक छलफलमा जुटेको छ ।
प्रधानमन्त्री एवं कांग्रेस सभापति शेरबहादुर देउवा पार्टीका शीर्ष नेतासँग बालुवाटारमा परामर्शमा छन् । त्यस्तै माओवादी अध्यक्ष पुष्पकमल दाहाल ‘प्रचण्ड’ निवास खुमलटारमा पनि अहिले शीर्ष नेतृत्वबीच छलफल चलिरहेको छ । सत्तागठबन्धनको बैठक ९ बजे बस्ने तय भएपनि दुई पार्टीको आन्तरिक छलफलका कारण ढिलो भइरहेको छ ।
प्रधानमन्त्रीका प्रेस सल्लाहकार गोविन्द परियारले शीर्ष नेताहरूबीच छलफल चलिरहेको बताए । त्यस्तै प्रचण्डका स्वकीय सचिव रमेश मल्लले पनि नेताहरूबीच भेटघाट जारी रहेको जानकारी दिएका छन् ।
गठबन्धनको बैठकमा प्रस्तुत हुने विषयमा रणनीति बनाउन दुई दलका शीर्ष नेतृत्व आन्तरिक छलफल गरिरहेको बताइएको छ ।
गठबन्धनबाट आलोपालोमा को पहिले प्रधानमन्त्री बन्ने भन्ने टुंगो लागिसकेको छैन । माओवादी अध्यक्ष प्रचण्डले पहिलो चरणमा प्रधानमन्त्री दाबी गरिरहेका छन् । कांग्रेसमा ठूलो दलको हैसियतले माओवादीलाई प्रधानमन्त्री नछाड्न तीब्र दबाब छ । शनिबार बालुवाटारमा भेला भएका सांसदहरूले देउवालाई प्रधानमन्त्री नछाड्न भनेका थिए ।
पहिला प्रधानमन्त्री नपाए गठबन्धन छाड्ने माओवादीले देउवालाई संकेत दिइसकेको छ । देउवाले मिलाउने भन्दै आश्वासन दिएका छन् । तर, अहिलेसम्मको अवस्था हेर्दा गठबन्धनमा सहमतिको सम्भावना देखिइसकेको छैन ।
