पासपोर्टबिना नेपालमा बस्दै आएका २४ बङ्गलादेशी नागरिक पक्राउ

काठमाडौं – नेपालमा गैरकानुनी रूपमा बसोबास गर्दै आएका २४ जना बङ्गलादेशी नागरिकलाई प्रहरीले पक्राउ गरेको छ।

जिल्ला प्रहरी परिसर काठमाडौंका अनुसार ती नागरिक विभिन्न समयमा नेपाल प्रवेश गरे पनि आवश्यक परिचय खुल्ने कागजात, पासपोर्ट तथा वैध बसाइ अनुमति नवीकरण नगरी राजधानीका विभिन्न स्थानमा बस्दै आएका थिए । केहीले पर्यटक भिसाको अवधि सकिएपछि पनि नेपाल नछोडी बसोबास गरिरहेको प्रहरीले जनाएको छ ।

प्रहरी वृत्त स्वयम्भूबाट खटिएको टोलीले काठमाडौं महानगरपालिका–१५ अन्तर्गत डल्लु, सितापाइला लगायतका क्षेत्रमा सञ्चालन भइरहेका कपडा उद्योग तथा कारखानामा छापा मार्ने क्रममा उनीहरूलाई नियन्त्रणमा लिएको हो । प्रहरीका अनुसार पक्राउ परेकाहरू त्यहीँ काम गरिरहेको अवस्थामा फेला परेका थिए ।

प्रहरीले उनीहरूको बसाइ तथा नेपाल प्रवेशसम्बन्धी कागजातको अनुसन्धान गरिरहेको जनाएको छ । पक्राउ परेका सबैलाई थप कानुनी प्रक्रिया अघि बढाउन अध्यागमन विभाग, कालीकास्थान पठाइएको छ ।

जिल्ला प्रहरी परिसर काठमाडौंका प्रवक्ता प्रहरी उपरीक्षक पवनकुमार भट्टराईले विदेशी नागरिकको बसाइ र गतिविधिमाथि निगरानी बढाइएको बताउँदै अध्यागमनसम्बन्धी कानुन उल्लंघन गर्ने जो–कोहीमाथि कारबाही हुने स्पष्ट पारे ।