श्रावण ३०, २०८३ / 2026-08-15
काठमाडौं– बालेन्द्र शाह ‘बालेन’ सरकारले शासकीय सुधारको कार्यसूची अघि सारेपछि पुँजीबजारका कारोबारी तर्सिएको देखिएको छ । बालेनको नेतृत्वमा सरकार बनेपछि नेप्से दुई दिनदेखि निरन्तर ओरालो लागेको देखिएको हो ।
बालेन नेतृत्वको सरकारले पहिलो मन्त्रिपरिषद्को बैठकबाट नै सरकारले शासकीय सुधारको क्षेत्रमा आगामी दिनमा गर्ने १ सय कार्यसूची अघि सारेको छ । जसमा सम्पत्तिको डिजिटल तथ्यांक सुरुवात गर्नेदेखि निजी क्षेत्रलाई स्वस्थ प्रवर्द्धन गर्नेसम्मका विषय छन् ।
विशेषगरी अनुत्पादक क्षेत्रको रूपमा परिचित हुँदै आएको दोस्रो पुँजीबजार सरकारको सुशासनमुखी कदम देखेर तर्सिएको देखिएको छ ।
आइतबार ७१.०५ अंकले घटेको नेप्से सोमबार पनि ४७.७१ अंकले घटेर २८३१.३९ विन्दुमा पुगेको छ । आज नेप्सेमा गिरावट आउँदा २३७ वटा कम्पनीको सेयर मूल्य घट्यो भने २६ वटा कम्पनीको सेयर मूल्य बढ्यो । तर, आज ५ वटा कम्पनीको सेयर मूल्य भने स्थिर रहेको छ ।
सोमबार कारोबार भएका मध्ये रिलायन्स स्पिनिङ मिल्सको सेयर मूल्य सबैभन्दा धेरै बढेको छ भने सोलु हाइड्रोपावरको सेयर मूल्य सबैभन्दा धेरै घटेको छ । आज सेयर बजारमा गिरावट आउँदा सबै समूहको उपसूचक पनि नकारात्मक बन्न पुगेको छ ।
