आश्विन २१, २०८३ / 2026-10-07
काठमाडौं– नेकपा एमाले भोजपुर जिल्ला कमिटीको मंगलबार बसेको छैठौं पूर्ण बैठकले आगामी प्रतिनिधि सभा सदस्य निर्वाचनका लागि पार्टी केन्द्रीय सचिव शेरधन राईलाई सर्वसम्मत रूपमा उम्मेदवार चयन गरेको छ ।
बैठकमा शरणकुमार राईले शेरधन राईको नाम प्रस्ताव गरेका थिए भने प्रदेश कमिटी सदस्य रोशन बस्नेतले समर्थन गरेका थिए ।
प्रस्ताव र समर्थनपछि बैठकले शेरधन राईलाई सर्वसम्मत उम्मेदवारका रूपमा चयन गरेको हो ।
मंगलबार सम्पन्न प्रतिनिधि छनोट बैठकमा शेरधन राई, रोशन बस्नेत र शरणकुमार राई गरी तीन जनाको दाबी प्रस्तुत भएको थियो ।
लामो छलफलपछि शरणकुमार राईले बैठकलाई सम्बोधन गर्दै शेरधन राईले अन्तिम पटक उम्मेदवारी दिने इच्छा व्यक्त गरेकाले उनलाई प्रस्ताव गरेको बताए ।
त्यसैगरी रोशन बस्नेतले पनि बैठकमा विशेष सम्बोधन गर्दै पार्टी हित र एकतालाई ध्यानमा राख्दै एक पटकका लागि शेरधन राईलाई समर्थन गर्ने घोषणा गरेपछि सर्वसम्मत निर्णय सम्भव भएको हो ।
