भाद्र ६, २०८३ / 2026-08-22
काठमाडौं- चैत २० गतेदेखि काठमाडौंमा निरन्तर आन्दोलित शिक्षकहरूको आन्दोलनमा विपक्षी दलका नेताहरूले पनि भौतिक रुपमै सहभागिता जनाउन थालेका छन् ।
प्रमुख प्रतिपक्षी नेकपा माओवादी केन्द्रका अध्यक्ष पुष्पकमल दाहाल प्रचण्डले माग पूरा नभएसम्म आन्दोलनको नेतृत्व गरिहेको शिक्षक महासंघलाई सडक नछाड्न यसअघि नै भनिसकेका छन् ।
सत्तारूढ नेकपा एमालेका महासचिव शंकर पोखरेल र उपमहासचिव प्रदीप ज्ञवालीसहितले शिक्षक आन्दोलनमा घुसपैठ हुन थालेको बताइरहेको सन्दर्भमा सोमबार एउटा विपक्षी दलका नेताहरूले भौतिक रूपमै सहभागिता जनाएका छन् ।
संसद्मा विपक्षी दल नेकपा एकीकृत समाजवादी पार्टीका अध्यक्ष माधवकुमार नेपाल, वरिष्ठ नेता झलनाथ खनाल, वरिष्ठ उपाध्यक्ष राजेन्द्र पाण्डेसहितका नेताहरू सोमबार बिजुलीबजारस्थित आर्क ब्रिज क्षेत्रमा पुगेर शिक्षक आन्दोलनमा सहभागिता जनाएका हुन् ।
सत्तारूढ दलले तत्कालीन शिक्षा मन्त्री विद्या भट्टराईले तयार पारेको ७ बुँदे प्रस्ताव विपक्षी नेताहरूकै इशारामा शिक्षकहरूले अस्वीकार गरेको बताइरहेका छन् । यस्तोमा विपक्षी दलका नेताहरू शिक्षकहरूलाई साथ दिन सडकमै पुग्न थालेका छन् ।
