आश्विन ६, २०८३ / 2026-09-22
दोलखा– दोलखाको बैतेश्वर गाउँपालिका–४ स्थित हनुमन्तेश्वर माध्यमिक विद्यालय नमुनाको विद्यालय व्यवस्थापन समिति (विव्यस) सदस्य चयनका लागि मंगलबार मतदान भइरहेको छ ।
विद्यालय व्यवस्थापन समितिको ७ सदस्यीय समितिमा खुला पुरुष सदस्यका दुई पदमा सहमति जुट्न नसकेपछि निर्वाचनमार्फत सदस्य चयन गर्न लागिएको हो ।
दुई सदस्य पदका लागि तीन जना अभिभावक उम्मेदवार बनेपछि उनीहरूबीच चुनावी प्रतिस्पर्धा भएको निर्वाचन अधिकृत जनक अधिकारीले जानकारी दिए ।
खुला पुरुष सदस्यका लागि रत्नबहादुर दाहाल, नवीनकुमार खतिवडा र पोष्टबहादुर दाहाल उम्मेदवार छन् । बिहान १० बजेदेखि सुरु भएको मतदान प्रक्रिया दिउँसो २ बजेसम्म सञ्चालन हुने निर्वाचन अधिकृत अधिकारीले बताए ।
विद्यालयमा झन्डै ५ सय अभिभावक मतदाता रहेका छन् । दिउँसो १२ः३० बजेसम्म १ सय ७० अभिभावकले मतदान गरिसकेको अधिकारीले जानकारी दिए ।
मतदान सकिएपछि आजै मतगणना गरी निर्वाचित सदस्यको घोषणा गरिनेछ ।
