११ जिल्लाका ८२ ठाउँमा वर्ड फ्लू संक्रमण पुष्टि

काठमाण्डौ - चरा तथा पन्छीहरूमा लाग्ने अतिसङ्क्रामक भाइरल रोग ‘वर्ड फ्लू’ यस वर्ष अहिलेसम्म ११ जिल्लाका ८२ ठाउँमा देखिएको छ । 

पशु सेवा विभागका महानिर्देशक डा उमेश दाहालका अनुसार गएको चैत ४ गते मोरङ जिल्लामा देखिएको वर्ड फ्लू अहिलेसम्म ११ जिल्लाको ८२ ठाउँमा फैलिएको हो । झापा, मोरङ, सुनसरी, महोत्तरी, बारा, चितवन, नवलपरासी, काठमाडौँ, भक्तपुर, ललितपुर र काभ्रेमा वर्ड फ्लू देखिएको छ ।  

अहिलेसम्म वर्ड फ्लूबाट प्रभावित भएका पाँच लाख ६९ हजार ८५८ पन्छी र नौ लाख ८९ हजार ३ सय १३ वटा अण्डा र एक लाख ९५ हजार ४८५ किलो दाना नष्ट गरेको विभागले जनाएको छ । कोशी प्रदेशमा एक महिनासम्म रोग नियन्त्रणका लागि पन्छीको ओसारपसारमा रोक लगाएकोमा अहिले रोग नियन्त्रण आएपछि सोलाई खुकुलो बनाइएको डा दाहालले बताउनुभयो । 

झापा, मोरङ, सुनसरी, महोत्तरी, बारा, चितवन, नवलपरासीमा रोग नियन्त्रणमा आइसकेको छ । काठमाडौँ उपत्यकाका तीन जिल्ला र काभ्रेका केही स्थानमा वर्ड फ्लू रोगको प्रकोप देखिएको छ । उपत्यकामा विशेष सावधानी अपनाउन विभागले आग्रह गरेको छ । 

फार्म परिसरमा जैविक सुरक्षाको विधिहरू अपनाउने, अण्डा राख्ने कागजको पुरानो क्रेट पुनः प्रयोगमा नल्याउने, ढुवानीको साधनलाई फार्म परिसरभित्र ल्याउन पर्ने भएका पुनः निसङ्क्रमण गरेर मात्र भित्र्याउनेजस्ता कार्य गर्नुपर्दछ । 

यस्तै कागलगायत जङ्गली पन्छीहरू घरपालुवा पन्छीको दाना लसपस हुन नदिने गरी थुनेर पन्छी पालन गर्नुपर्दछ । पन्छीको उत्पादनको ओसारपसार गर्दा अनिवार्य रूपमा भेटेरिनरी प्रमाणपत्र लिएर मात्र गर्नुपर्दछ ।