सरकारलाई घेर्न विपक्षी दलको बैठक, सहभागी भएन हर्कको श्रमसंस्कृति

काठमाडौं- वालेन्द्र शाह नेतृत्वको शक्तिशाली सरकार पनि संसद् छलेर अध्यादेशतिर अघि बढेपछि विपक्षी दलहरू संगठित भएका छन्।

प्रधानमन्त्री शाहले संवैधानिक परिषद् र सहकारीसम्बन्धी दुई अध्यादेश जारी गर्न मंगलबार राष्ट्रपति रामचन्द्र पौडेलसमक्ष सिफारिस गरेसँगै राजनीतिक तरंग ल्याएको छ ।

संवैधानिक परिषद्मा अल्पमतमा रहेका वालेन्द्रले तत्कालीन प्रधानमन्त्री केपी शर्मा ओलीकै शैलीमा तीनजना जुट्दा निर्णय गराउन सक्ने गरी अध्यादेश राष्ट्रपतिकहाँ पठाएका छन् ।

त्यसपछि प्रमुख प्रतिपक्षी नेपाली कांग्रेसले आह्वान गरेको विपक्षी दलहरूको बैठक सिंहदरबारमा बसेको हो । यो बैठक अहिले कांग्रेस संसदीय दलको कार्यालयमा बसिरहेको छ।

बैठकमा एमालेबाट संसदीय दलका नेता रामबहादुर थापा ‘बादल’, नेपाली कम्युनिस्ट पार्टीबाट प्रमुख सचेतक युवराज दुलाल र राष्ट्रिय प्रजातन्त्र पार्टीबाट सांसद सरस्वती लामा सहभागी छन् ।

यस बैठकमा श्रम संस्कृति पार्टीले भने सहभागिता जनाएको छैन । श्रमसंस्कृतिले राष्ट्रिय स्वतन्त्र पार्टीको सहयोगमा उपसभामुख पद लिएको छ।

तर उसका अध्यक्ष हर्क साम्पाङले सामाजिक सञ्जालमा सरकार र प्रधामन्त्री बालेनको कडा आलोचना गरिरहेका छन् । सुकुम्वासी हटाएको प्रकरणमा त उनी सरकारसँग झनै आक्रोशित छन् । तर पनि उनले आफ्नो पार्टीका कुनै प्रतिनिधि विपक्षी दलको बैठकमा पठाएनन्।