जेठ ५, २०८३ / 2026-05-19
नयाँ दिल्ली । बलिउडकी चर्चित अभिनेत्री तथा गायिका सुलक्षणा पण्डितको निधन भएको छ । बिहीबार मुम्बईको नानावती अस्पतालमा ७१ वर्षको उमेरमा उनको निधन भएको हो ।
सन् १९७० र १९८० को दशकमा आफ्नो अभिनय र गायनबाट प्रसिद्धि हासिल गरेकी थिइन् । सुलक्षणाको बिहीबार राति ८ बजे हृदयघातका कारण मृत्यु भएको उनको भाइ ललित पण्डितले बीबीसी हिन्दीलाई बताए ।
सुलक्षणा पण्डितले सञ्जीवकुमार अभिनीत सन् १९७५ को फिल्म ‘उल्झन’ बाट नायिकाको रूपमा आफ्नो अभिनय करियर सुरु गरेकी थिइन् । त्यसपछि उनले १९७० र १९८० को दशकमा सङ्कोच, हेरा फेरि, अपनपन, खानदान, धर्म कान्ता, चेहरे पे चेहरा र वक्त की दिवार लगायत धेरै फिल्ममा अभिनय गरिन् ।
उनले आफ्नो समयका सञ्जीवकुमार, जितेन्द्र, राजेश खन्ना, शशि कपूर, विनोद खन्ना र शत्रुघ्न सिन्हा जस्ता कयौँ प्रख्यात कलाकारहरूसँग काम गरिन् ।
सुलक्षणाले आफ्नो गायन करियर बाल गायिकाको रूपमा लता मंगेशकरसँग १९६७ को फिल्म ‘तकदीर’ मा गीत गाएर सुरु गरेकी थिइन् । पछि पार्श्व गायिकाको रूपमा उनले किशोर कुमार, मोहम्मद रफी, शैलेन्द्र, येसुदास, महेन्द्र कपूर र उदित नारायणलगायत कयौँ प्रख्यात गायकहरूसँग गीत गाइन् ।
हिन्दीका साथै उनले बंगाली, उडिया, गुजराती र मराठी गीतहरूमा पनि आफ्नो आवाज दिएकी थिइन् । सुलक्षणा पण्डितको अन्तिम संस्कार शुक्रबार दिउँसो १२ बजे मुम्बईमा गरिने बताइएको छ ।
