जेठ ५, २०८३ / 2026-05-19
सुलीकोट । उत्तरी गोरखाको चुमनुब्री गाउँपालिका–३ पाङसिङका ५ घरमा ढुङ्गा, माटोसहितको लेदो पस्दा क्षति पुगेको छ । शनिबार बेलुका ६ बजेतिर आएको ढुंगा, माटो सहितको लेदोले पाङसिङका स्थानीय बासिन्दाको बस्तीमा ठुलो क्षति पुगेको जिल्ला प्रहरी कार्यालय गोरखाका प्रहरी नायब उपरीक्षक राजकुमार श्रेष्ठले जानकारी दिनुभयो ।
उहाँका अनुसार लगातर वर्षापछि माथिल्लो भागबाट आएको माटो, र ढुंगा सहितको पहिरोले पाङसिङको गाउँ बस्तीको बीचमा पसेर देबेन्द्र गुरुङको कुखुराको फर्मका ५० वटा कुखुरा बगाएर लगेको उहाँले बताउनुभयो ।
त्यस्तै पाङसिङका सर्किनी गुरुङको एक तले काठले बारेको टिनले छाएको कच्ची घरमा पानी, ढुंगा सहितको लेदोले घर पुर्णरुपमा क्षति गरेको जिल्ला प्रहरी कार्यालय गोरखाले जनाएको छ ।
अर्का एक स्थानीय जुक बहादुर गुरुङको घरमा माटो सहितको लेदोले १३ वटा कुखुरा बगाएको छ भने धन्डुक गुरुङको एक तले कच्ची घरमा क्षति पुर्याइ ८ वटा कुखुरा र ६ वटा हाँस बगाएको स्थानिय बम बहादुर गुरुङले बताउनुभयो ।
५ घर परिवारको घर भित्र रहेको अन्नपात, कपडा र घरेलु सबै सामान बगाएर लगेका स्थानीय कमला गुरुङले बताउनुभयो । ५ घरका मानिसहरु अहिले छिमेकी घरमा साहारा लिएर बसेका स्थानिय कमला गुरुङको भनाइ छ ।
घरमा क्षति भएको खबर सिर्दीबास प्रहरी चौकीमा पुगेपछि सिर्दिबासको प्रहरी टोली घट्नास्थल पुगी मुचुल्का तयारी गरी १० औँ लाख क्षति भएको मुचुल्का तयार गरिएको जिल्ला प्रहरी कार्यालय गोरखाले जनाएको छ ।
