आश्विन १७, २०८३ / 2026-10-03
काठमाडौं- नेकपा (एमाले) का सांसद सूर्यबहादुर थापा क्षत्रीले सहकारीको बचत रकम ठगी प्रकरणमा भैरहवा जेलमा रहेका राष्ट्रिय स्वतन्त्र पार्टीका सभापति रवि लामिछानेको पक्षमा थालिएको हस्ताक्षर अभियानलाई ‘राजनीतिक प्रोपोगान्डा’को संज्ञा दिएका छन् ।
सर्वोच्च अदालतलेसमेत तत्काल प्राप्त प्रमाणका आधारमा निर्दोष भन्न नमिल्ने निचोडसहित थुनामै राख्न भनेको अवस्थामा रास्वपाले थालेको हस्ताक्षर अभियानलाई उनले राजनीतिक प्रपोगान्डा भनेका हुन् ।
प्रतिनिधिसभाको सोमबार बसेको बैठकलाई सम्बोधनका क्रममा सहकारीको ठगी छानबिनसम्बन्धी संसदीय समितिका अध्यक्षसमेत रहेका थापाले रास्वपाको कदमको औचित्य नरहेको बताएका हुन् ।
‘२०८२ असार ७ गते नै भैरहवा कारागारमा पुर्पक्षमा रहेका एक व्यक्तिको नाममा १५ पृष्ठको अपिल आएको छ । त्यसलाई अपिल भनेको छैन, मैले त याचना पत्र भनेको छु । त्यही याचनापत्रसहित अहिले हस्ताक्षर अभिायन जारी छ,’ उनले भने, ‘सर्वोच्च अदालतमा, उच्च अदालतमा र जिल्ला अदालतमा आधा दर्जनभन्दा बढी मुद्दा चलिरहेका छन् । त्यसलाई प्रतिशोध भन्ने कि राजनीति ? त्यसलाई प्रतिशोध भन्दै हस्तक्षर अभियान चलिरहेको छ, त्यो राजनीति हो । त्यो राजनीतिक प्रोपोगाण्डा हो ।’
