आश्विन २०, २०८३ / 2026-10-06
तनहुँ– आकाशे पानीको भरमा मात्रै खेती गर्नुपर्ने अवस्था रहेको जिल्लाको बन्दीपुर–४ स्थित खहरे–बिरुवा क्षेत्रमा अब बाह्रै महिना सिँचाइ सुविधा हुने भएको छ ।
जलस्रोत तथा सिँचाइ विकास डिभिजन कार्यालयको सहयोगमा देवीखोला खहरे बिरुवा सिँचाइ योजना सम्पन्न भएपछि यहाँका करिब एक सय घरपरिवार लाभान्वित भएका छन् । सिँचाई सुविधा पुगेपछि मौसमी र बेमौसमी तरकारी उत्पादनका साथै अन्य बाली लगाउन सहज हुने देवीखोला–खहरे–बिरुवा सिँचाइ उपभोक्ता समितिका अध्यक्ष हरिकाशी गुरुङले जानकारी दिए ।
‘गत वर्ष मुहानमा च्याम्बर निर्माण गरी २ नंं ट्याङ्कीसम्म एक हजार ८०० मिटर लामो ११० एमएमको पाइप जडान गरिएको छ,’ अध्यक्ष गुरुङले भने, ‘पहिलो वर्ष २ नं टयाङ्की निर्माण गरी तीन वटा गेटवाल राखेर २० वटा धारा जडान गरिएको थियो ।’
उनले भने, ‘यस चालु वर्षमा १ नं टयाङ्की निर्माण गरी चार वटा गेटवाल राखेर २८ वटा धारा जडान गरिएको छ भने यसै वर्ष दुई वटा धारा थप गरी ५० वटा धारा पुर्याइएको छ ।’
एक लाख ८० हजार लिटर क्षमताका दुई वटा रिजर्भ टयाङ्की निर्माण गरी पानी सङ्कलन गरेर धाराबाट सिँचाइको व्यवस्था मिलाइएको छ । उक्त योजनाबाट ३०० रोपनी क्षेत्रफल सिञ्चित हुने बताइएको छ । योजना सम्पन्न गर्नका लागि सिँचाइ डिभिजन कार्यालयबाट गत वर्ष ४५ लाख रुपैयाँ र यस वर्ष २५ लाख गरी ७० लाख रुपैयाँ बजेट विनियोजन भएको उपभोक्ता समितिकी सचिव सीता रानाले बताइन् ।
आगामी वर्षका लागि १० लाख रुपैयाँ बजेट विनियोजन गरी सत्र वटा थप धारा निर्माण गर्ने योजना रहेको सो कार्यालयले जनाएको छ । समयमै सम्झौता गरी समयमै निर्माण कार्य सम्पन्न गरिएको कार्यालय प्रमुख मोहनराज आचार्यले जानकारी दिए ।
‘आकाशेपानीको भर पर्नु पर्दैन,’ प्रमुख आचार्यले भने, ‘नयाँ प्रविधिमा आधारित सिँचाइ योजनाले अब बाह्रै महिना सिँचाइमा सजिलो बनाइदिएको छ ।’ उनका अनुसार फलफूलजन्य र तरकारीजन्य उत्पादनमा प्रोत्साहन गर्दै नमूना कृषि फार्मका रूपमा विकास गर्न सिँचाइले बाटो खोलिदिएको छ ।
