प्रधानमन्त्री ओलीको दोहोरो चरित्रले देश र जनताले दुःख पाएका छन् :  साह

काठमाडौँ । आम जनता पार्टी (आजपा)का अध्यक्ष प्रभु साहले प्रधानमन्त्री केपी शर्मा ओलीको दोहोरो चरित्रले देश र जनताले दुःख पाइरहेको टिप्पणी गरेका छन् । साथै प्रधानमन्त्री ओलीले पद र पावरको दुरुपयोग गरिरहेको उनको आरोप छ । 

आजपा अध्यक्ष साहले आज सामाजिक सञ्जाल फेसबुकमा एक स्ट्याटस लेख्दै यस्तो आरोप लगाएका हुन् । गत बुधबार सिराहा पुगेका प्रधानमन्त्री ओलीले जनता समाजवादी पार्टी नेपाल (जसपा) बाट निर्वाचित धनगढीमाई नगरपालिका–७ का वडाध्यक्ष विजय महतोलाई टिकामाला लगाई नेकपा (एमाले)मा प्रवेश गराएका थिए । 

एमालेका अध्यक्ष समेत रहेका प्रधानमन्त्री ओलीले एक पार्टीबाट निर्वाचित जनप्रतिनिधिलाई आफ्‌नो पार्टीमा प्रवेश गराउँदै गर्दा खुसी देखिएको तर उही प्रधानमन्त्री ओलीले २०८० सालको असोजमा रौतहटको मौलापुर नगरपालिकाका मेयर रिनाकुमारी साहलाई पदमुक्त गराएको आजपा अध्यक्ष साहले बताए।