आश्विन १३, २०८३ / 2026-09-29
काठमाडौं – एसोसिएसन अफ प्रिस्कुल एजुकेटर्स इन नेपाल (एपेन) ले रसुवामा आएको बाढीबाट प्रभावितका लागि ११ लाख ११ हजार १११ राहत रकम योगदान गरेको छ।
एपेनले नेपालभरिका विभिन्न पूर्वप्राथमिक विद्यालयबाट संकलन गरेको उक्त रकम मंगलबार शिक्षा मन्त्री सस्मित पोखरेललाई औपचारिक रूपमा हस्तान्तरण गरेको हो।
एपेनका अनुसार हस्तान्तरण गरिएको रकम प्रधानमन्त्री दैवी प्रकोप उद्धार कोषमा जम्मा गरिनेछ। गत भदौ १० गते रसुवामा आएको बाढीबाट प्रभावित तथा पीडितको सहयोगका लागि एपेनले राहत रकम संकलन गरेको जनाएको छ।
प्राकृतिक विपत्तिबाट प्रभावित समुदायलाई सहयोग गर्ने उद्देश्यले सञ्चालन गरिएको अभियानले सामाजिक उत्तरदायित्व, मानवीय भावना र ऐक्यबद्धता प्रतिबिम्बित गरेको एपेनले जनाएको छ।
एपेनले राहत अभियानमा सहयोग गर्ने सम्पूर्ण पूर्वप्राथमिक विद्यालय, शिक्षक–शिक्षिका तथा सहयोगीप्रति आभार व्यक्त गरेको छ।
