आश्विन ५, २०८३ / 2026-09-21
काठमाण्डाै – हिमपहिरोमा पुरिएर मनास्लु हिमालमा दुई जनाको ज्यान गएको छ । भारतीय मूलका जर्मनीका नागरिक र नेपाली नागरिकको गएराति हिमपहिरोमा पुरिएर ज्यान गएको हो ।
सुतिरहेको टेन्टमा माथिबाट आएको हिमपहिरोले पुरिएर जर्मनीका आरोही ध्रुवज्योति गुहा र उहाँका आरोहण सहयोगी फुर्सेम्बा शेर्पाको ज्यान गएको जिल्ला प्रहरी कार्यालय गोरखाले जनाएको छ ।
दुवै जना मकालु एड्भेन्चर कम्पनी प्रालिबाट मनास्लु आरोहणका लागि गएका थिए । तेस्रो शिविरमा टेन्टभित्रै झन्डै सात फिट हिउँले पुरिएर दुवै जनाको ज्यान गएको प्रहरीले जनाएको छ । उनीहरूको शव आज हेलिकप्टरबाट काठमाण्डौ ल्याउने तयारी छ ।
यससँगै मनास्लुमा यस याममा ज्यान जानेको सङ्ख्या चार पुगेको छ । यसअघि सिङ्गापुरका आरोही ५० वर्षीय लाउ वी सेङको दोस्रो शिविरमा ज्यान गएको थियो । साथै नेपाली सहयोगी २० वर्षीय टासी शेर्पाको पनि आधार शिविरमा ज्यान गएको थियो ।
मनास्लु आरोहणका लागि यस याममा ४८० विदेशी आरोहीले अनुमति लिएका छन् । आरोहणका लागि डाेरी टाँग्ने काम सम्पन्न भइसकेको छ । आरोहीहरू आरोहणको अन्तिम तयारी गरिरहेका छन् ।
