गुणस्तर मापदण्ड नपुगेको उच्च रक्तचापको औषधि बजारबाट फिर्ता गर्न विभागको निर्देशन

काठमाडौं– औषधि व्यवस्था विभागले गुणस्तर परीक्षणमा असफल भएको उच्च रक्तचाप नियन्त्रणमा प्रयोग हुने एक औषधि बजारबाट तत्काल फिर्ता गर्न निर्देशन दिएको छ ।

विभागले सोमबार जारी गरेको सूचना अनुसार बजार अनुगमनका क्रममा संकलन गरिएको एमफास्ट–एल नामक औषधिको नमुना राष्ट्रिय औषधि प्रयोगशालामा परीक्षण गर्दा निर्धारित गुणस्तर मापदण्ड पूरा नगरेको पाइएको हो ।

विभागका अनुसार उक्त औषधिको खेप नम्बर ०२५०७९ रहेको छ । यो औषधि जुन २०२५ मा उत्पादन भई मे २०२७ सम्म प्रयोगयोग्य रहने उल्लेख गरिएको छ । परीक्षणका क्रममा औषधिले घुलनशीलता परीक्षणसम्बन्धी आईपी–२०२६ मापदण्ड पूरा नगरेको पाइएको विभागले जनाएको छ । 

त्यसैले औषधि ऐन, २०३५ को दफा १४ बमोजिम उक्त खेपको बिक्री–वितरण रोक्का गरी बजारबाट फिर्ता गर्न सम्बन्धित उत्पादक तथा प्रतिनिधिलाई निर्देशन दिइएको छ । सूचनाअनुसार उक्त औषधि भेगा औषधि उद्योग प्रालि, बुङमती–२, ललितपुरले उत्पादन गरेको हो ।

विभागले स्वास्थ्यकर्मी, औषधि व्यवसायी तथा सर्वसाधारणलाई उक्त खेप नम्बरको औषधि सिफारिस, बिक्री–वितरण तथा प्रयोग नगर्न आग्रह गर्दै बजारमा उपलब्ध भएमा सम्बन्धित निकायलाई जानकारी गराउन अनुरोध गरेको छ ।