श्रावण ५, २०८३ / 2026-07-21
नयाँदिल्ली– भारतको हिमाली राज्य सिक्किममा निर्माणाधीन जलविद्युत् आयोजनाको सुरुङ भत्किँदा कम्तीमा नौ जना मजदुरको मृत्यु भएको छ भने १५ जना अझै सुरुङभित्र फसेको आशंका गरिएको छ। विषाक्त मिथेन ग्यासका कारण उद्धार कार्य जटिल बनेको अधिकारीहरूले मङ्गलबार बताएका छन्।
दुर्घटना सोमबार टिस्टा नदीमा निर्माणाधीन सरकारी जलविद्युत् परियोजनाको सुरुङमा मजदुरहरू निर्माण कार्य गरिरहेका बेला भएको हो। सुरुआतमा २५ देखि २७ जना मजदुर सुरुङभित्र फसेको अनुमान गरिएको थियो।
सिक्किम राज्य विपद् व्यवस्थापन प्राधिकरणका निर्देशक राजीव रोकाले हालसम्म नौ जनाको शव निकालिएको र अझै १५ जना सुरुङभित्र रहेको अनुमान गरिएको जानकारी दिए। उनका अनुसार उनीहरूको खोजी तथा उद्धारका लागि विशेष टोली परिचालन गरिएको छ।
प्रारम्भिक अनुसन्धानअनुसार सुरुङ भत्किनुको कारण विस्फोट हुन सक्ने अनुमान गरिए पनि वास्तविक कारण अझै खुल्न सकेको छैन। दुर्घटना सुरुङको गहिरो भागमा भएकाले अनुसन्धान र उद्धार कार्य दुवै चुनौतीपूर्ण बनेका छन्। अधिकारीहरूले पछिल्ला केही दिनदेखि परेको भारी मनसुनी वर्षाले पनि दुर्घटनामा भूमिका खेलेको हुन सक्ने बताएका छन्।
उद्धार अभियानमा सबैभन्दा ठूलो चुनौती सुरुङभित्र चट्टानबाट निस्किएको विषाक्त मिथेन ग्यास बनेको छ। अक्सिजन उपकरणसहितका विशेष उद्धार टोलीलाई मात्र सुरुङभित्र प्रवेश गर्न अनुमति दिइएको छ।
ग्यासको उच्च मात्राका कारण अभियान जोखिमपूर्ण भए पनि तीव्र गतिमा जारी रहेको अधिकारीहरूले बताएका छन्। खानी दुर्घटनामा उद्धारको अनुभव भएका दक्ष टोलीसमेत परिचालन गरिएको छ।
भारतमा ठूला पूर्वाधार निर्माणका क्रममा यस्ता दुर्घटना बारम्बार हुने गरेका छन्। वातावरणविद्हरूले हिमाली क्षेत्रमा तीव्र गतिमा भइरहेका विकास निर्माण गतिविधिले प्राकृतिक जोखिम बढाएको भन्दै सतर्कता अपनाउन आग्रह गर्दै आएका छन्।
यसअघि सन् २०२३ मा उत्तराखण्डमा निर्माणाधीन सडक सुरुङ भत्किँदा ४१ जना मजदुर १७ दिनसम्म सुरुङभित्र फसेका थिए। लामो उद्धार अभियानपछि उनीहरूलाई सकुशल बाहिर निकालिएको थियो।
