जेठ १५, २०८३ / 2026-05-29
काठमाडौं- नेपाली कांग्रेसको भ्रातृ संगठन नेपाल थारु संघले पहिलो पटक महाधिवेशनमार्फत नेतृत्व चुन्ने भएको छ । संघको पहिलो महाधिवेशन शनिबार हुँदैछ ।
यो संस्थाले २०७९ साउनमा पार्टीको केन्द्रीय कार्यसमितिबाट भ्रातृ संगठनको रुपमा मान्यता पाएको थियो । यस सँगै तत्कालीन सभापति शेरबहादुर देउवाले विभिन्न जिल्लाका ९८ जना नेता तथा कार्यकर्तालाई थारु संघको सदस्यमा मनोनयन गरेका थिए ।
पार्टीका कार्यवाहक मुख्यसचिव कृष्णप्रसाद दुलालका अनुसार सभापति गगनकुमार थापाले थारु संघको प्रथम महाधिवेशन उद्घाटन गर्नेछन् ।
महाधिवेशन पार्टी केन्द्रीय कार्यालय सानेपामा दिउँसो १२ः१५ बजेबाट सुरु हुनेछ । उक्त संघमा हाल शिवनारायण महतो गुरौले अध्यक्षता गरिरहेका छन् ।
सभापति थापाले २१ वैशाखमा पार्टीका १३ मध्ये ५ वटा भातृसंस्थाले समयमै महाधिवेशन गर्न नसकेको भन्दै कार्यसमिति विघटन गरेका थिए ।
विघटन हुनेमा नेविसंघ, तरुण दल, महिला संघ, दलित र लोकतान्त्रिक खेलकुद संघ छन् । तीमध्ये महिला संघ र तरुण दलमा सभापति थापाले क्रमशः मीनाकुमारी खरेल र मनिस कोइरालाई तदर्थ अध्यक्ष नियुक्ति गरिसकेका छन् ।
