जेठ ७, २०८३ / 2026-05-21
ललितपुर- विभिन्न सामाजिक सञ्जालमा ‘तुलसा कलेक्सन’ नामले परिचित टिकटकर तुल्सा अधिकारीसहित ६ जनाविरुद्ध जिल्ला सरकारी वकिल कार्यालयले सम्पत्ति शुद्धीकरण (मनी लाउन्डरिङ) मुद्दा बिहीबार दर्ता गरेको छ।
तुल्सासहितविरुद्ध लगाइएको अभियोगपत्रमा हुण्डीमार्फत् रकम पठाउने–पठाउन लगाउने कार्य गरेर अवैध सम्पत्तिको स्रोत लुकाउने, रूपान्तरण तथा हस्तान्तरण गरेको आरोप सरकारी वकिलको कार्यालयले लगाएको छ।
तुल्सासहित सपना वली, निलिका लामिछाने, प्रेमनाथ बस्याल, प्रयास पोखरेल र गंगा अधिकारी सुवेदीविरुद्ध पनि मुद्दा चलेको छ। तुल्सासँग मात्रै ६ करोड ५२ लाख २९ हजार रुपैयाँ बिगो कायम गरिएको छ।
सरकारी वकिलको कार्यालयले उनीहरूले गैरकानुनी रूपमा आर्जित रकमको वास्तविक स्रोत, प्रकृति, स्थान र स्वामित्व लुकाउने प्रयास गरेको पनि जनाएको छ।
यस प्रकरणमा तुल्सासहित ६ जनाविरुद्ध २१ करोड १२ लाख २० हजार ४ सय ६ रुपैयाँ बिगो कायम गरेर मुद्दा चलाइएको हो ।
सरकारी वकिलको कार्यालयले उनीहरूविरूद्ध सम्पत्ति शुद्धीकरण निवारण ऐन, २०६४ (संशोधनसहित) अन्तर्गत सजाय माग गरेको छ।
