भाद्र ५, २०८३ / 2026-08-21
काठमाडौं– नेपाल कम्युनिष्ट पार्टी (एमाले)ले आफ्नो चुनावी घोषणापत्रमार्फत प्राविधिक तथा उच्च शिक्षा अध्ययन गर्ने विद्यार्थीलाई २० लाख रुपैयाँसम्म निर्ब्याजी ऋण उपलब्ध गराउने घोषणा गरेको छ ।
घोषणापत्र अनुसार प्राविधिक धारमा उच्च शिक्षा अध्ययन गर्न चाहने विद्यार्थीलाई सहज रूपमा निर्ब्याजी ऋण उपलब्ध गराइनेछ । यसबाट प्राविधिक शिक्षा अध्ययनमा आर्थिक अभावका कारण हुने अवरोध हटाउने र दक्ष जनशक्ति उत्पादनमा सहयोग पुग्ने अपेक्षा गरिएको छ ।
त्यसैगरी, सरकारी सेवा, निजी क्षेत्रका व्यवसाय तथा अध्यापन क्षेत्रमा न्यूनतम पारिश्रमिकसहित इन्टर्नसिपको व्यवस्था गरिने एमालेले जनाएको छ । यस कार्यक्रमले विद्यार्थीलाई अध्ययनसँगै व्यावहारिक अनुभव प्राप्त गर्न, सीप विकास गर्न र रोजगारीको अवसर विस्तार गर्न मद्दत पुग्ने विश्वास गरिएको छ ।
एमालेले शिक्षा र रोजगारीबीचको सम्बन्धलाई सुदृढ गर्दै युवालाई दक्ष, आत्मनिर्भर र प्रतिस्पर्धी बनाउने लक्ष्य घोषणापत्रमार्फत अघि सारेको जनाएको छ ।
