भाद्र ४, २०८३ / 2026-08-20
काठमाडौं– सुशीला कार्की नेतृत्वको अन्तरिम सरकारले निर्वाचन विरोधी गतिविधि गरेको आरोपमा नेकपाका महासचिव ऋषि कट्टेललाई पनि पक्राउ गरेको छ। उनीसँगै नेकपा बहुमतका महासचिव धर्मेन्द्र बास्तोला पनि समातिएका छन् ।
कट्टेललाई बुधबार दिउँसो करिब १ बजे कीर्तिपुरबाट पक्राउ गरिएको हो । काठमाडौं उपत्यका अपराध अनुसन्धान कार्यालयका प्रवक्ता प्रहरी उपरीक्षक रामेश्वर कार्कीले कट्टेलाई पक्राउ गरिएको बताए । उता बास्तोलालाई प्रहरीले मंगलबार नै समातिसकेको छ ।
मंगलबार बास्तोलासहित नेकपा बहुमतका नेता विष्णुप्रसाद तिमिल्सिना र दुर्गा प्रसाईं समूहका एसपी शाहलाई प्रहरीले हिरासतमा लिएको छ ।
कट्टेल नेतृत्व नेकपा, नेकपा बहुमतसहित साना कम्युनिस्ट दलहरूले निर्वाचन बहिष्कार गर्ने बताएका छन् । बहिष्कार गर्ने भनेकै भरमा उनीहरूलाई निर्वाचन विरोधी करार दिएर सरकारले धरपकड गरेको हो ।
उनीहरूले निर्वाचन अवधिमा आपराधिक गतिविध गर्न सक्ने अनुमानसहित समातिएको हो । मेडिकल व्यवसायी दुर्गा प्रसाईंलाई सोमबार पक्राउ गरेर चार दिनको म्याद लिइएको छ।
