चितवनका मतदाता फकाउँदै रवि भन्छन् : मसँग इमानबाहेक अरू केही पनि छैन

चितवन – राष्ट्रिय स्वतन्त्र पार्टी(रास्वपा)का सभापति रवि लामिछानेले आगामी निर्वाचनपछि बलियो सरकार बन्ने र जनताको समस्या समाधान गर्ने बताएका छन् ।

सोमबार चितवनको कालिका नगरपालिका–३ मा स्थानीयसँगको छलफलमा लामिछानेले अहिले देशभर रास्वपाको पक्षमा माहोल बनेको बताए ।

उनले आफूसँग इमानबाहेक अरू केही पनि नरहेको पनि बताएका छन् । ‘मसँग इमानबाहेक केही छैन, इमान डगमगाउन दिन्नँ’, उनले भने, ‘सुकुम्बासी समस्या अब नरहने गरि समाधान हुन्छ।’

आगामी निर्वाचनपछि बलियो सरकार बन्ने र जनताको समस्या समाधान गर्ने उनले बताए । यसअघि सरकारमा रहँदा जनताका समस्या समाधान गर्ने धेरै कोशिस गर्दागर्दै पनि पूरा गर्न नसकिएको उनले बताएका छन् ।

उनले सुकुम्वासीको समस्या आयोग बनाएर नै दीर्घकालीन रुपमा समाधान गर्ने प्रतिवद्धता पनि जनाएका छन् ।

कालिका– ३ मा स्थानीयले सुकुम्वासी समस्या समाधानका लागि पटक पटक आश्वासन पाए पनि समाधान हुन नसकेको भन्दै लामिछानेको ध्यानाकर्षण गराए ।