बैशाख १३, २०८३ / 2026-04-26
काठमाडौं– नवौँ एनभीए महिला तथा पुरुष भलिबल च्याम्पियनसिपको महिलातर्फको खेलमा एभरेष्ट भलिबल क्लबले चुली युवा क्लबलाई पराजित गरेको छ ।
बुधबार त्रिपुरेश्वरस्थित राष्ट्रिय खेलकुद परिषद (राखेप) कभर्डहलमा भएको खेलमा एभरेष्ट भलिबल क्लबले चुली युवा क्लबलाई ३–० को सोझो सेटमा पराजित गर्दै सान्त्वना जित हासिल गरेको छ ।
सेमिफाइनल समीकरणबाट बाहिरिइसकेको एभरेष्टले २५–१४, २५–५, २५–११ ले चुलीलाई पराजित गरेको हो । पराजित चुली युवा क्लब पनि सेमिफाइनल समीकरणबाट बाहिरिइसकेको छ ।
त्यस्तै बुधबार नै भएको महिलातर्फको खेलमा पुलिस क्लबले मधेश प्रदेशलाई ३–० को सोझो सेटमा पराजित गर्यो । पुलिसले २५–३, २५–८ र २५–९ मधेशलाई पराजित गरेको हो ।
जितसंगैं पुलिसले सेमिफाइनलमा आर्मी क्लबको भेट पक्का गरेको छ । समूह ‘बी’ मा शतप्रतिशत नतिजा निकाल्दै पुलिस समूह विजेता बन्न सफल भयो ।
शुक्रबार हुने सेमिफाइनलमा पुलिस र आर्मी तथा एपिएफ र न्यु डायमन्ड स्पोर्टस क्लबसँगबीच प्रतिस्पर्धा हुने भलिबल संघले जनाएको छ ।
