विवादित उपदफा खारेजीको माग गर्दै देशभरका औषधि व्यवसायी आन्दोलित

काठमाडौं– औषधि व्यवस्था ऐनका दुई उपदफा खारेज गर्न माग गर्दै देशभरका औषधि व्यवसायी आज आन्दोलनमा उत्रिएका छन् । 

औषधि ऐन २०३५ को दफा ११ अन्तर्गतका उपदफा ३ र ५ तत्काल खारेज गर्नुपर्ने मागसहित उनीहरूले आज देशभरका औषधि पसल एक घण्टाका लागि बन्द गरेका हुन् ।

आइतबार बिहान ११ बजेदेखि आयात, थोक तथा खुद्रा सबै प्रकारका औषधि पसल एकै पटक बन्द गर्दै व्यवसायीहरू औषधि व्यवस्था विभाग पुगेका छन् । विभागको केन्द्रीय तथा शाखा कार्यालयहरूसहित सम्बन्धित निकायहरूमा व्यवसायीहरूले धर्ना दिँदै विरोध जारी राखेका छन् ।

विवादित उपदफा खारेज नगरेसम्म आन्दोलनलाई थप कडा बनाउँदै लैजाने औषधि व्यवसायी संघले चेतावनी पनि दिएको छ ।