जेठ ५, २०८३ / 2026-05-19
काठमाण्डौ – वर्षौंदेखि अलपत्र अवस्थामा रहेको पितिवाङ खोलामा पुल निर्माण कार्य शुरू भएको छ ।
राप्ती राजमार्गअन्तर्गत रुकुम पश्चिमको मुसिकोट नगरपालिका–११ र १२ को सिमानामा पर्ने पितिवाङ खोलामा नयाँ निर्माण कम्पनीसँग ठेक्का सम्झौता भएसँगै पुल निर्माण शुरू भएको हो ।
यसअघि निर्माणको जिम्मा लिएको संरक्षण निर्माण सेवा चितवनले समयमा काम सम्पन्न नगरेपछि नयाँ निर्माण कम्पनीसँग ठेक्का सम्झौता भएको हो ।
संरक्षण निर्माण सेवा र सडक डिभिजन कार्यालय चौरजहारीबीच दुई वर्षमा काम सम्पन्न गर्नेगरी २०७६ असार ८ गते सम्झौता भएको थियो ।
सम्झौताअनुसार संरक्षण निर्माण सेवाले काम सम्पन्न नगरेपछि गएको मङ्सिरमा यति बिल्डर्सले पुल निर्माणको जिम्मा पाएको सडक डिभिजन कार्यालय चौरजहारीका प्रमुख इञ्जिनियर तेजस्वी शर्माले जानकारी दिनुभयो ।
पाँच करोड २८ लाख रुपैयाँ लागतमा पुल निर्माणको सम्झौता भएको हो । यसअघिको निर्माण कम्पनीले पुलको एकतर्फी पिलर मात्र उठाएर अलपत्र छोडेको थियो ।
नयाँ कम्पनीले जिम्मा लिएसँगै दुवैतर्फ पिलर उठाएर ढलानको तयारी भइरहेको इञ्जिनियर शर्माले बताउनुभयो । उहाँका अनुसार पुल सिङ्गल स्पानको ३५ मिटर लामो रहनेछ ।
चालु आर्थिक वर्षभित्र सबै काम पूरा गरेर गाडी आवतजावतको व्यवस्था गरिने निर्माण कम्पनीका सञ्चालक भीमराज केसीले जानकारी दिनुभयो ।
