धामी हेर्न आएका समूहको कुटाइबाट १ जनाको मृत्यु

काठमाडौं– पाँचथरमा धामी झाँक्री हेर्न आएका समूहको कुटपिटबाट १ जनाको मृत्यु भएको छ । ३७ वर्षीय दिनेशकुमार राईको उपचारका क्रममा पाँचथर अस्पतालमा मृत्यु भएको हो ।

फिदिम नगरपालिका– १४ मा बिहीबार राति ९ः३० बजे धामी झाँक्री हेर्न आएका १४ वडाका दिनेशकुमारको सामूहिक कुटपिटबाट मृत्यु भएको जिल्ला प्रहरी कार्यालय पाँचथरका सूचना अधिकारी बिनालाल साह तेलीले खबरहबलाई बताए ।

उनका अनुसार दुई समूहको झगडाबाट एक जनाको मृत्यु भएको हो । के कारणले झगडा सुरु भएको भन्ने बारेमा अनुसन्धान गरिरहेको छ ।

स्थानीय धनकुमार राईको घरमा बिहीबार राति धामी झाँकी बस्ने कार्यक्रम भएको थियो ।

बिहीबार साँझ राति धनकुमारको घरमा चिन्ता बसेको हेर्न आएका दिनेशसहित २८ वर्षीय परशुराम राई, २२ वर्षीय ध्रुव राई र २६ वर्षीय पुष्कर विश्वकर्मा समेतलाई त्यहाँ आएका २० जनाको समूहले कुटपिट गरेका थिए ।

साहका अनुसार कुटपिट गरी हत्यासम्म भएको अभियोगमा प्रहरीले तीन जनालाई नियन्त्रणमा लिएको छ ।