भाद्र ८, २०८३ / 2026-08-24
गौर । रौतहटको गौर नाकाबाट अहिले व्यापक तस्करी चलिरहेको छ। नेपाल प्रहरीका डिआइजी बसन्त कुंवर मधेस प्रदेश रहिन्जेल तस्करी निकै नियन्त्रणमा आएपनि उनी एआइजीमा बढुवा भएसंगै काठमाडौ गएपछि फेरि तस्करी धन्दा मौलाएको छ । तस्करी नियन्त्रणको प्रमुख जिम्मेवारी पाएको सशस्त्र प्रहरी नै तस्करी गराउने , सेटिङ र संरक्षण गराउने भए पछि कसले तस्करी नियन्त्रण गर्ने ?
सशस्त्र प्रहरीमा राम्रो र धेरै अतिरिक्त आम्दानी हुने बिओपीहरूमा संगठन भित्र र बाहिरबाट टेण्डर हालेर जाने र त्याहां गएपछि तस्करी गराएर जसरी पनि पैसा असुली गर्ने परिपाटी निरीक्षक तहमा होडबाजी हुन थालेपछि हालका सशस्त्र प्रहरी महानिरीक्षक राजु अर्यालले क श्रेणीका बिओपीमा डिएसपी राख्ने निर्णय गरेका छन् । खटिने डिएसपीहरू सिनियर र बढुवा हुने क्रमका भएको कारण उनीहरू खटिएपछि तस्करी कम होला र भ्रष्टाचार केही मात्रामा भए पनि नियन्त्रण होला भन्ने पवित्र उद्देश्य आइजिपी राजु अर्यालको देखिन्छ ।
अहिले गौर भन्सार स्थित बिओपीमा कार्यरत निरीक्षक महेश्वर गिरी सरूवा भएर उनको ठाउँमा डिएसपी सूर्य तिमिल्सिनाको सरूवा भएको छ । तर यस नाकाबाट हुने तस्करी रोकिएको छैन उल्टो चलेको चल्यै छ । उक्त बिओपीमा कार्यरत सई खिल नारायण श्रेष्ठ र बरिस्ठ हवल्दार रामजनम यादवको संरक्षण र सेटिङमा अहिले खुलेयाम तस्करी चलिरहेको छ । निरीक्षक गिरी हुदां पनि तस्करीको सेटिङ र सन्जाल यिनै सई श्रेष्ठ र बरिस्ठ हवल्दार यादवले मिलाउने गरेका थिए । घुमुवा समेत रहेका हवल्दार यादवको घर पनि यहीँ गौर नगरपालिका भएको कारण उनले धेरै व्यापारी देखि तस्करहरू चिन्ने र सबै सेटिङ मिलाउने काम गर्दै आइरहेको बताइन्छ ।
अहिले गौर नाकाबाट तस्करीको काम गर्नेमा ३०÷४० जना रहेको महिलाको समूह रहेको छ । कि त पहिले नै तस्करीको लाइन दिने , त्यसपछि सामान बरामद गरि छोडेर रकम असुल्ने र अन्तमा सेटिङ मिलाई उनीहरूसंग मासिक रकमको कारोबार गर्ने काम यहाँ सशस्त्र प्रहरीले गर्दै आएको छ । यसका अलावा रौतहटकै दुधियाभार स्थित बेश क्याम्पका पनि सशस्त्रको असुलीले व्यापारी मात्रै होइन तस्करहरू पनि आजित भएका छन् । गौर , बंकुल , गोलागंज लगायतका नाकाबाट जतिपनि तस्करीको सामान नेपाल भित्रिन्छ ती सबै मध्ये धेरै सामान गरूणा बजार आउने गर्दछ । यस बेशमा निरीक्षक बसेपनि व्यापारी र तस्करसँग रकमको कारोवार गर्ने काम सहायक हवल्दार सुभाष सिंहले गर्दै आएको सोही बेशमा कार्यरत एक जुनियर अधिकारीले जानकारी दिए । कहिलेकाही संचार त कहिले बाहिर हेर्न सिंहलाई तत्कालीन मधेस प्रदेशका डिआइजी चन्द्र प्रकाश गौतमले सर्लाहीमा धेरै बदनाम भएपछि रौतहट काज सरूवा गरिदिएका थिए । अहिले सहायक हवल्दारमा बढुवा भए पछि उनको दरबन्दी नै रौतहट भएको छ । बेशको प्रमुखको रूपमा उनले सबै आर्थिक कारोवार गरिरहेको जानकारी गण सम्म पुगेपनि कुनै छानबिन त परैजावोस उनलाई बेशबाट हटाउने काम पनि भएको छैन । उनलाई संरक्षण गरेको देख्दा व्यापारी र तस्करसंग असुली गरेको रकम कतै गण सम्म त पुगेको छैन ? भन्ने प्रश्न गणमा चर्चा चल्न थालेको छ।
