मधेश प्रदेशमा इन्जिनियरिङ अध्ययन संस्थानको नयाँ क्याम्पस स्थापना गरिने

काठमाडौँ – सरकारले मधेश प्रदेशमा त्रिभुवन विश्वविद्यालयअन्तर्गत इन्जिनियरिङ अध्ययन संस्थान (आईओई) को नयाँ आङ्गिक क्याम्पस स्थापना गर्ने तयारी अघि बढाएको छ ।

शिक्षा तथा खेलकुदमन्त्री सस्मित पोखरेलका अनुसार मधेश प्रदेशका विद्यार्थीलाई स्थानीयस्तरमै गुणस्तरीय प्राविधिक शिक्षा उपलब्ध गराउन यो कदम चालिएको हो ।

मन्त्री पोखरेलले नयाँ क्याम्पस स्थापनाका लागि उपयुक्त स्थान छनोट गर्न अध्ययन समिति गठन गर्न लागिएको जानकारी दिए । समितिको प्रतिवेदनका आधारमा स्थान तय गरी आगामी तीन वर्षभित्र पठनपाठन सुरु गर्ने लक्ष्य राखिएको छ ।

“प्रत्येक वर्ष मधेशबाट ठूलो सङ्ख्यामा विद्यार्थी इन्जिनियरिङ पढ्न काठमाडौँ लगायत अन्य क्षेत्रमा जान बाध्य छन्,” मन्त्री पोखरेलले भने, “यसले अभिभावकमाथि आर्थिक भार बढाउनुका साथै व्यावहारिक समस्या सिर्जना गरेकाले आफ्नै प्रदेशमा अवसर सिर्जना गर्न लागिएको हो ।”

नयाँ क्याम्पसलाई परम्परागत अध्यापनमा मात्र सीमित नराखी अनुसन्धान, नवप्रवर्तन र आधुनिक प्रविधिको व्यावहारिक प्रयोगमा केन्द्रित गराइने सरकारको योजना छ । हाल त्रिवि इन्जिनियरिङ अध्ययन संस्थानअन्तर्गत पुल्चोक, थापाथली, धरान, चितवन र पोखरामा आङ्गिक क्याम्पस सञ्चालित छन् । मधेशमा नयाँ क्याम्पस थपिएसँगै इन्जिनियरिङ शिक्षाको भौगोलिक पहुँच थप विस्तार हुनेछ ।