सभामुख अर्यालले गरे दलका नेतासँग छुट्टाछुट्टै छलफल

काठमाडौं– सभामुख डीपी अर्यालले प्रतिनिधिसभाको बैठकलाई थप प्रभावकारी, मर्यादित र परिणाममुखी बनाउने उद्देश्यसहित विभिन्न राजनीतिक दलका नेताहरूसँग मंगलबार छुट्टाछुट्टै भेटवार्ता गरेका छन्।

सभामुख अर्यालले नेकपा (एमाले) का संसदीय दलका नेता रामबहादुर थापा, नेपाली कांग्रेसका संसदीय दलका नेता भीष्मराज आङ्देम्बे तथा नेपाल कम्युनिष्ट पार्टीका नेता वर्षमान पुनसँग छुट्टाछुट्टै भेट गरी समसामयिक संसदीय विषयमा छलफल गरेका हुन्।

सभामुखको सचिवालयका अनुसार भेटका क्रममा प्रतिनिधिसभाको कार्यसम्पादनलाई थप प्रभावकारी, मर्यादित र परिणाममुखी बनाउने विषयमा विचार आदानप्रदान भएको थियो। साथै, संसद्को कार्यलाई सहमतिका आधारमा अघि बढाउने विषयमा पनि छलफल भएको जनाइएको छ।

यसैबीच, सभामुख अर्यालले मंगलबार नै विभिन्न राजनीतिक दलका प्रमुख सचेतक तथा सचेतकहरूसँग पनि छलफल गरेका छन्। उक्त छलफलमा प्रतिनिधिसभाको कार्य सञ्चालनलाई व्यवस्थित, प्रभावकारी र सहज बनाउने तथा आगामी बैठकका कार्यसूचीलाई योजनाबद्ध रूपमा अघि बढाउने विषयमा विचार आदानप्रदान भएको सचिवालयले जनाएको छ।

सभामुखले संसद्लाई जनअपेक्षाअनुसार प्रभावकारी बनाउन सबै राजनीतिक दलबीच सहकार्य र समन्वय आवश्यक रहेको धारणा राखेको बताइएको छ।