आषाढ ४, २०८३ / 2026-06-18
काठमाण्डौ - फिफा विश्वकप २०२६ मा कोलम्बियाले विजयी शुरुआत गरेको छ । मेक्सिको सिटी स्टेडियममा सम्पन्न खेलमा कोलम्बियाले उज्बेकिस्तानलाई ३–१ गोल अन्तरले पराजित गर्दै महत्त्वपूर्ण तीन अङ्क जोडेको छ ।
कोलम्बियाको जीतमा खेलको ४०औँ मिनेटमा ड्यानियल मुन्योसले गोल गर्दै अग्रता बनायो । पहिलो हाफ १–० को अवस्थामा सकिएको खेलमा उज्बेकिस्तानले दोस्रो हाफको ६०औँ मिनेटमा अब्बोसबेक फैजुल्लाएभको गोलमार्फत खेल बराबरीमा ल्यायो ।
तर त्यो खुशी लामो समय टिक्न सकेन । ६५औँ मिनेटमा लुइस डियाजले गोल गर्दै कोलम्बियालाई पुनः २–१ को अग्रता दिलाए । दोस्रो हाफमा उज्बेकिस्तानले दबाब सिर्जना गरे पनि बराबरी गोल निकाल्न सकेन । इन्जुरी समयको नवौँ मिनेटमा जामिन्टन क्याम्पाजले गोल थपेपछि कोलम्बियाले ३–१ गोलको जीत सुनिश्चित गर्यो।
कोलम्बियाले समूह ‘के’ मा महत्त्वपूर्ण तीन अङ्क जोडेको छ भने यसै समूहको अघिल्लो खेलमा गए राति पोर्चुगल र कङ्गोले १-१ को बराबरी खेल्दै अङ्क बाँडेका थिए ।
