आजदेखि ५०० रुपैयाँकाे नयाँ नोट चलनचल्तीमा

काठमाण्डाै – नेपाल राष्ट्र बैंकले ५०० रुपैयाँ दरको नयाँ बैंक नोट आजदेखि चलनचल्तीमा ल्याएको छ । नोटको आकार, रङ्ग तथा डिजाइन साविककै रहेको राष्ट्र बैंकको मुद्रा व्यवस्थापन विभागले निकालेको सूचनामा भनिएको छ ।

नोटको अग्रभागमा सगरमाथा हिमालको चित्र, लालीगुराँसको पानीछाप तथा दृष्टिविहीन व्यक्तिहरूले स्पर्शमार्फत दर पहिचान गर्न सक्ने दुई वटा काला थोप्ला राखिएका छन् ।

साथै सगरमाथाको दायाँतर्फ रहेको अण्डाकार आकृतिभित्रको कुबेरको चित्र सीधा हेर्दा सुनौलो र ढल्काएर हेर्दा हरियो देखिने व्यवस्था छ । नोटमा राखेको सुरक्षण धागो सीधा हेर्दा रातो र ढल्काएर हेर्दा हरियो देखिन्छ । नोटको पृष्ठभागमा पाटेबाघको चित्र रहेको छ ।

नयाँ नोटमा गभर्नर विश्वनाथ पौडेलको दस्तखत रहेको छ ।