दरबार हत्याकाण्डको फाइल खोल्ने नवनियुक्त गृहमन्त्री गुरुङको घोषणा

काठमाण्डौ - नवनियुक्त गृहमन्त्री सुधन गुरुङले दरबार हत्याकाण्डको अनुसन्धान प्रक्रिया अघि बढाउने निर्णय गर्नुभएको छ । 

हिजो पद तथा गोपनीयताको शपथ ग्रहण गरेलगत्तै सिंहदरबार पुगेर मन्त्रालयमा पदभार ग्रहण गर्दै उहाँले दरबार हत्याकाण्डसम्बन्धी यसअघि भएका अनुसन्धान प्रतिवेदनको अध्ययन गरी आवश्यक थप छानबिन प्रक्रिया अघि बढाउने घोषणा गर्नुभएको हो । 

उहाँले नवयुवा आन्दोलनसँग सम्बन्धित घटनामा फौजदारी अभियोजन गरिएका मुद्दा फिर्ता गर्न सकिने वा नसकिने विषयमा अध्ययन गरी सिफारिससहित प्रतिवेदन पेश गर्न विशेष कार्यदल गठन गर्ने समेत बताउनुभयो । गुरुङले गृह मन्त्रालय र नेपाल प्रहरीबाट संवेदनशील सूचना चुहावट रोक्न सूक्ष्म अध्ययन गरी दोषीमाथि कारबाही सिफारिस गर्न सुरक्षा निकायमा विशेष अनुसन्धान टोली (एसआईटी) गठन गर्ने घोषणा गर्नुभयो । 

उहाँले नेपाल प्रहरीको केन्द्रीय अनुसन्धान ब्युरो (सीआईबी) लाई थप प्रभावकारी बनाउँदै, अहिले प्रक्रियामा रहेका जघन्य अपराधका अनुसन्धान फाइलहरू शीघ्र टुङ्गोमा पुर्‍याउन निर्देशन समेत दिनुभयो । 

मन्त्री गुरुङले कुनै पनि नागरिकमाथि चरित्रहत्या गर्ने किसिमको व्यवहारको समेत मन्त्रालयले गम्भीरताका साथ हेर्ने बताउनुभएको छ ।