भाद्र ४, २०८३ / 2026-08-20
काठमाडौं – कात्तिक २१ लाई प्रदर्शन मिति तोकिएको फिल्म ‘जारी २’को ट्रेलर युट्युबमा सार्वजनिक भएको छ । ०८० सालमा प्रदर्शनमा आएको फिल्म ‘जारी’को सिक्वेल ‘जारी २’को ट्रेलर आइतबार सार्वजनिक गरिएको हो ।
‘जारी’का केही घटनालाई विकसितरुप दिएर ‘जारी २’मा प्रस्तुत गरिएको छ । पहिलो भागमा विवाहका लागि इच्छुक विजय बरालले दुलही भित्र्याएको ‘जारी २’को ट्रेलरमा देखाइएको छ । विजयको दुलहीका रुपमा नायिका श्रृजना निङ्लेखुको प्रवेश भएको छ ।
फिल्मका शीर्ष कलाकार दयाहाङ राई र मिरुना मगरको छोरी ठूली भएको ट्रेलरमा देखाइएको छ । ‘जारी’को अन्तिममा मिरुनाले छोरीको जन्म दिएकी थिइन् ।
फिल्ममा दम्पतीको भूमिकामा रहेका दयाहाङ र मिरुनाको घर झगडा ट्रेलरमा समावेश गरिएको छ । पहिलो भागमा जस्तै श्रीमान्सँगको झगडाले मिरुना माइती फर्किएको देखाइएको छ । उनी छोरीलाई घरमै छाडेर माइती फर्किएकी छन् ।
मिरुना माइती फर्किएको लामो समयसम्म पनि घर नफर्किएको ट्रेलरले बताउँछ । सोहीकारण माइतीमा उनको अर्को विवाहका लागि समेत कुरा चल्छ ।
अब मिरुना दयाहाङलाई जारी तिरेर अर्को विवाह गर्छिन् कि गर्दिनन् वा दयाहाङसँग पुनर्मिलन हुन्छ ? यही सस्पेन्सको कथामा फिल्म बनेको ट्रेलरले प्रष्ट पारेको छ ।
यो फिल्म बाँसुरी फिल्मस् र कबड्डी फिल्मस्को संयुक्त ब्यानरमा बनेको हो । निर्देशक र लेखक उपेन्द्र सुब्बा हुन् ।
ट्रेलर :
