भूमि आयोगद्वारा तनहुँका तीन पालिकामा जग्गा नापजाँच सुरु

तनहुँ– भूमि समस्या समाधान आयोगले तनहुँका तीन पालिकामा जग्गा नापजाँच सुरु गरेको छ । यसअघि जग्गा नापजाँचको काम सुरु भएर आयोग विघटन भएपछि रोकिएको काम पुनः सुरु भएको हो ।

आयोगले भानु नगरपालिका–२, व्यास नगरपालिका–१२ र शुक्लागण्डकी नगरपालिका–७ मा जग्गा नापजाँच सुरु गरेको हो । वर्तमान आयोग गठन भएपछि यसअघिको आयोगले गरेको कामलाई निरन्तरता दिइएको आयोगका विज्ञ सदस्य श्रीराम कार्कीले जानकारी दिए । व्यास–१२ र शुक्लागण्डकी–७ मा पचास प्रतिशत काम सम्पन्न भइसकेको छ विज्ञ सदस्य कार्कीले बताए ।

आयोगले भानु नगरपालिका, व्यास नगरपालिका, भिमाद नगरपालिका, म्याग्दे गाउँपालिका शुक्लागण्डकी नगरपालिकामा अभिमुखीकरण सम्पन्न गरिसकेको छ । जिल्लास्थित सबै स्थानीय तहमा पुगेर आयोगको काम, कर्तव्य र पालिकाको दायित्वका विषयमा अभिमुखीकरण गरिएको कार्कीले जानकारी दिए ।