आश्विन १४, २०८३ / 2026-09-30
काठमाडौँ । कृषि तथा पशुपक्षी विकासमन्त्री रामनाथ अधिकारीले वार्षिक करिब २२ लाख कृषक परिवारले अनुदानमा रासायनिक मल प्राप्त गर्ने गरेको बताएका छन् । सोमबारको प्रतिनिधि सभा बैठकमा बोल्दै उनले यस्तो बताएका हुन् ।
कृषिमन्त्री अधिकारीले करिब १ लाख ५० हजार परिवारले बीमाको प्रिमियममा अनुदान प्राप्त गर्ने बताए । उनले नेपालमा ४१ लाख ३० हजार कृषक परिवार रहेको बताए । उनले नेपाल सरकारले कृषि क्षेत्रको विकास, संरक्षण र प्रवर्द्धनका लागि कृषकहरूलाई संघ, प्रदेश र स्थानीय तहबाट सहुलियत सुविधा, अनुदान र सेवा प्रदान गर्दै आएको बताए ।
कृषिमन्त्री अधिकारीले नेपाल सरकारले रासायनिक मलको मूल्यमा, सिँचाइको लागि विद्युत् महसुलमा, कृषि तथा पशुपक्षी बीमा प्रिमियममा, उखु किसानलाई उत्पादनमा, कृषि क्षेत्रमा यान्त्रिकीकरण गर्न मेसिनरी औजारमा, कृषि कर्जाको ब्याजमा, गहुँ, मकैको बीउको मूल्यमा, फलफूल बिरुवा विशेषबाट सेवा, सुविधा र सहुलियत प्राप्त गर्ने कृषकहरू र रोपण गर्ने कृषकलाई बिरुवाको मूल्यमा, माछा पोखरी निर्माण जस्ता क्षेत्रमा कृषकलाई अनुदान उपलब्ध गराउँदै आएको जनाए ।
मन्त्री अधिकारीले प्रदेश सरकार र स्थानीय तहले आफ्नो आवश्यकताअनुरूप दुधको उत्पादन, निश्चित सङ्ख्या भन्दा बढी भेडा, च्याङ्ग्रा, याक पाल्ने कृषकलाई पशुवस्तुको उपचार खर्च बजार मूल्यमा सहुलियत प्रदान गर्दै आएको बताए । प्रोत्साहन अनुदान कृषकको खातामै जाने व्यवस्था गरिएको पनि बताए ।
