आश्विन २०, २०८३ / 2026-10-06
काठमाडौं- प्रमुख सत्तारूढ नेकपा एमालेका अध्यक्ष केपी शर्मा ओलीले आगामी आर्थिक वर्ष २०८१/८१ का लागि सरकारले ल्याएको बजेटप्रति असन्तुष्टि नरहेको स्पष्टीकरण दिएका छन् ।
संसद् भवन नयाँ बानेश्वरमा सञ्चारकर्मीको प्रश्नमा ओलीले बजेटमा असन्तुष्टि नरहेको जवाफ दिएका हुन् । उनले यसअघि शनिबार दिएको आफ्नो अभिव्यक्तिको पनि बचाउ गरेका छन् ।
उनले बजेट निर्माणका क्रममा सत्ता साझेदार दलहरूसँग छलफल भएको भए बजेट अझै राम्रो हुने आफ्नो धारणा रहेको प्रतिक्रिया पनि दिए ।
यसअघि शनिबार बसेको एमाले संसदीय दलको बैठकमा ओलीले बजेट अर्थमन्त्रीले भन्दा पार्टीले ल्याएको जस्तो भएको टिप्पणी गरेका थिए ।
यसअघि आइतबार बसेको संसद् बैठकमा जेठ १५ गते प्रस्तुत विनियोजन विधेयकमाथिको छलफलमा भाग लिने क्रममा पूर्व अर्थमन्त्री एवम् एमाले उपाध्यक्ष विष्णुप्रसाद पौडेलले पनि असन्तुष्टि जनाएका थिए ।
उनले बजेटमा केही कमजोरी र समस्या देखिएको भन्दै तयारीकै बेला अर्थमन्त्रीले सल्लाह गरेको भए ती नदेखिने बताए ।
