हात्ती धपाउन खोज्दा घरमा आगलागी : आमा छोराको मृत्यु

चितवन – चितवनमा जंगली हात्तीको आक्रमण र आगलागीबाट आमा–छोराको मृत्यु भएको छ । शनिबार राति ११ बजे को भरतपुर महानगरपालिका–२३, बेलहट्टा स्थानीय पूर्ण बोटेको कच्ची घरमा हात्तीले आक्रमण गर्दा सुतिरहेकी २५ वर्षीया आशिका बोटे र ४ वर्षीय छोरा भरत बोटेको ज्यान गएको हो ।

भरतपुर महानगरपालिका–२३ का वडाध्यक्ष दीपक दवाडीका अनुसार हात्तीले घर भत्काउन थालेपछि पूर्ण बोटेले धपाउनका लागि आगो बाल्ने प्रयास गरेका थिए । सोही क्रममा कच्ची घरमा आगो सल्केको प्रहरीले जनाएको छ । स्थानीय र प्रहरीको सक्रियतामा आगो नियन्त्रणमा लिइएको थियो ।

घटनापछि शनिबार राति नै चितवन राष्ट्रिय निकुञ्ज कार्यालय, स्थानीय जनप्रतिनिधि, नयाँ गोरखा गण, मध्यवर्ती उपभोक्ता समिति र प्रहरी टोलीबीच छलफल भएको छ ।

छलफलमा निकुञ्ज कार्यालयमार्फत पीडित परिवारलाई तत्काल उचित राहत उपलब्ध गराउने, क्षतिग्रस्त घर पुनर्निर्माण गरिदिने र हात्तीलाई तत्काल नियन्त्रणमा लिने सहमति भएको छ ।

जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलका अनुसार घटनास्थलको आवश्यक कानुनी प्रक्रिया तथा मुचुल्का सम्बन्धी कार्य सम्पन्न भएको बताएका छन् ।