भाद्र ५, २०८३ / 2026-08-21
काठमाडौं– राष्ट्रिय स्वतन्त्र पार्टी (रास्वपा) सभापति रवि लामिछाने मङ्गलबार साँझ प्रधानमन्त्री निवास बालुवाटार पुगेका छन् ।
सो पार्टीकी सांसद् रहेकी उपसभामुख इन्दिरा रानामगरलाई हटाउन सत्तारुढ नेपाली कांग्रेस र नेकपा (एमाले)ले हस्ताक्षर सङ्कलन थालेपछि प्रधानमन्त्री केपी शर्मा ओलीलाई भेट्न लामिछाने बालुवाटार पुगेका हुन् ।
उपसभामुख हटाउन भइरहेको प्रयासबारे लामिछानेले प्रधानमन्त्रीसँग सोधखोज गर्न लामिछाने बालुवाटार पुगेका रास्वपाका एक नेताले जानकारी दिए । ती नेताका अनुसार; लामिछानेले सो बारे सोध्दा प्रधानमन्त्री ओलीले ‘बाहिर आएको हल्लाजस्तो केही भएको छैन’ भनी जवाफ दिएका थिए ।
प्रधानमन्त्रीले लामिछानेलाई दिएका जवाफ उद्धृत गर्दै ती नेताले भने, ‘बाहिर आएको हल्ला जस्तो केही पनि काम भएको छैन, तपाईं हल्लाका पछाडि नदौडिनुहोला ।’
रविले सांसदहरूको हस्ताक्षर अभियानका विषयमा पनि प्रश्न गरेका थिए। तर, प्रधानमन्त्रीले यस विषयमा कुनै कार्यहरू अगाडि नबढेको बताएका थिए । प्रधानमन्त्रीको सचिवालयका अनुसार उपसभामुख हटाउने विषयमा प्रधानमन्त्रीले कुनै छलफल नगरेको जवाफ रविलाई दिएका थिए ।
प्रधानमन्त्रीले यसो भने पनि उपसभामुख मगरलाई हटाउने विषयमा सत्ता साझेदार दलहरूले मङ्गलबारबाट हस्ताक्षर अभियान सुरु नै गरिसकेका छन् । बुधबार या बिहीबार बस्ने प्रतिनिधि सभा बैठकमा बहुमत सांसद्को हस्ताक्षर पेश गर्ने योजनासहित सत्तारुढ दल अघि बढेका हुन् ।
उपसभामुख सन् २०२३ फ्रेब्रुअरी २६ मा रानाले अमेरिकाको न्यूयोर्कमा आयोजना भएको ‘एनजीओ सीएसडब्लु ६७’ कार्यक्रममा आफूसहित अन्य पाँचजना सहभागी हुन जान लागेको र व्यस्त कार्यतालिका भएकाले भिसाको अन्तर्वाताको मिति मिलाइदिन दूतावासलाई पत्र लेखेकी थिइन् । सत्तारुढ दलहरूले यसैलाई आधार बनाएर उनलाई हटाउने तयारी गरेका हुन् ।
खासगरी प्रधानमन्त्री ओली र कांग्रेस सभापति शेरबहादुर देउवाले संवैधानिक परिषदमा बहुमतमा नभएका कारण उपसभामुखलाई हटाउन खोजेका हुन् ।
