आषाढ १३, २०८३ / 2026-06-27
काठमाडौं- भदौ २३ र २४ गते भएको जेन–जी आन्दोलनको क्रममा बानेश्वरस्थित यातायात व्यवस्था विभाग जलेर क्षतिग्रस्त बन्यो । विभागको सवारीचालक अनुपतिपत्र (लाइसेन्स) छाप्ने ५ वटा ‘मास प्रिन्टर’ सहित डाटा प्रणाली र समग्र पूर्वाधारमा क्षति पुग्यो ।
यसकारण तत्काल सेवा प्रवाह गर्न नसक्ने निर्णयमा विभाग पुग्यो । सेवाग्राहीको अत्याधिक चाप हुने देशैभरका यातायात कार्यालय करिब २ महिनासम्म ठप्प भए । अस्थायी प्रणाली स्थापना गरेर सवारी दर्ता, नवीकरण, चालक अनुमतिपत्र परिक्षा लगायतको सेवा सुरु गरेपनि विभागले लाइसेन्स छपाईको काम भने गर्न सकेन ।
त्यसपछि विभागले लाइसेन्स छपाईको जिम्मा सुरक्षण मुद्रण केन्द्रलाई दियो । विभागले १२ लाख थान लाइसेन्स ६ महिनाभित्र छपाई सम्पन्न गर्नेगरी कार्तिक १२ गते केन्द्रसँग सम्झौता गरेको थियो । निवर्तमान सञ्चार तथा सूचना प्रविधिमन्त्री जगदीश खरेलले गत कार्तिक २१ गते केन्द्रमा रहेको प्रिन्टिङ प्रेसको बटन थिचेर लाइसेन्स छपाइको शुभारम्भ गरेका थिए ।
नयाँ ट्रायल पास भएका र नवीकरणका लागि आवेदन दिएका गरी सो अवधीमा विभागसँग करिब २५ लाखको हाराहारीमा स्मार्ट लाइसेन्स प्रिन्ट हुन बाँकी थियो । तर बजेट अपुग हँदा पहिलो चरणमा २७ करोड ६० लाख रुपैँया बजेटमा १२ लाख थान मात्र छपाई गर्नेगरी विभागले सम्झौता गरेको जनाएको थियो ।
